Wednesday, July 2, 2008

സര്‍ക്കാര്‍ രാജ്: അധികാരത്തിന്‍‌റ്റെ കുതിപ്പും കിതപ്പും

സംവിധാനം: രാം ഗോപാല്‍ വര്‍മ്മ
കഥ, തിരക്കഥ, സംഭാ ഷണം: പ്രശാന്ത് പാണ്ഡേ
നിര്‍മ്മാണം: പ്രവീണ്‍ നിശ്ചല്‍, രാം ഗോപാല്‍ വര്‍മ്മ
അഭിനേതാക്കള്‍: അമിതാബ് ബച്ചന്‍, അബിഷേക് ബച്ചന്‍, ഐശ്വര്യ ബച്ചന്‍, ദിലീപ് പ്രഭവല്‍ക്കര്‍, ഗോവിന്ദ് നാംദേവ്, രവി കാലെ തുടങ്ങിയവര്‍
റിലീസിംഗ് തിയ്യതി: 6 ജൂണ്‍‍‍‍, 2008
സിനിമ കണ്ടത്: 9 ജൂണ്‍‍‍‍, 2008 @ മുകുന്ദ, ബാംഗ്ലൂര്‍
ദൃശ്യന്റെ റേറ്റിംഗ്: 6.14 @ 10


ഈ സിനിമ റിലീസ് ചെയ്തീട്ട് ഒരുപാട് നാളായി. ഞാന്‍ കണ്ടതും കുറേ മുന്‍പാണ്. സമയക്കുറവ് മൂലം അന്ന് എഴുതാനായില്ല. അതു കൊണ്ട് വളരെ ചുരുക്കി എന്റെ അഭിപ്രായം പറയുക മാത്രമേ ചെയ്യുന്നുള്ളു ഇവിടെ.


അധികാരം എന്ന വാക്കിനെ, അതിന്റെ അര്‍ത്ഥവ്യാപ്തിയെ, അതിന്റെ രാഷ്ടീയോപയോഗത്തെ ഒരു കുടുംബത്തിന്റെ പശ്ചാത്തലത്തില്‍ ഭംഗിയായ് അവതരിപ്പിച്ച സിനിമയായിരുന്നു ‘സര്‍ക്കാര്‍‘. വിദേശസിനിമകളില്‍ നിന്ന് മോഷ്ടിച്ച നല്ല കഥകളെ വികലമാക്കി അവതരിപ്പിക്കുന്നതില്‍ മുന്‍പന്തിയില്‍ നില്‍കുന്ന ബോളിവുഡില്‍, ‘ഗോഡ്‌ഫാദര്‍’ എന്ന നിത്യഹരിതക്ലാസ്സിക്കില്‍ നിന്ന് പ്രചോദനം നേടിയതാണെന്ന് തുറന്ന് പറഞ്ഞ് കൊണ്ട് വന്ന്, നിരൂപകപ്രശംസ നേടിയ ഒരു ചിത്രമായിരുന്നു അത്. അത്തരമൊരു ചിത്രത്തിന്റെ രണ്ടാം ഭാഗത്തെ കുറിച്ച് പ്രേക്ഷകര്‍ക്ക് അമിതപ്രതീക്ഷയുണ്ടാവുക സ്വാഭാവികം. അത് തന്നെയാവണം ഈ ‘സര്‍ക്കാര്‍ രാജിന്’ പ്രതികൂലമായ് നിന്നത്. സാധാരണബോളിവുഡ് സിനിമകളില്‍ നിന്ന് ബഹുദൂരം മുന്നിലെങ്കിലും നല്ലൊരു സിനിമ എന്ന നിലയിലേക്ക് വരാന്‍ സര്‍ക്കാര്‍ രാജിന് കഴിഞ്ഞില്ല. സമീപകാല രാംഗോപാല്‍ വര്‍മ്മ ചിത്രങ്ങളുമായ് താരതമ്യപ്പെടുത്തിയാല്‍ നന്നെങ്കിലും മികച്ച ഒരു രചനയെയും നല്ല പ്രകടനങ്ങളേയും പാഴാക്കി കളഞ്ഞു എന്ന കുറ്റപ്പെടുത്തലില്‍ നിന്ന് സംവിധായകന് ഒഴിഞ്ഞ് മാറാനാകില്ല.. ഇതിലുമെത്രയോ മികച്ചതായ് മാറേണ്ടിയിരുന്ന ഒരു ചിത്രം ‘തരക്കേടില്ല’ എന്ന അഭിപ്രായം നേടിയെടുത്ത കാഴ്ചയാണ് സര്‍ക്കാര്‍ രാജ് നമുക്ക് കാണിച്ച് തരുന്നത്.


നാഗ്രേ എന്ന സര്‍ക്കാറിനെ അവതരിപ്പിച്ച അമിതാബ് ബച്ചന്‍ ‘സര്‍ക്കാറിലെ’ അഭിനയത്തില്‍ നിന്ന് തെല്ലും വ്യതിചലിച്ചിട്ടില്ല. തന്റെ ഏറ്റവും വലിയ അസറ്റ് - ശബ്ദം - ഈ സിനിമയുടെ മൂഡിനനുസരിച്ച് ഉപയോഗിച്ചിരിക്കുന്നു അദ്ദേഹം. ശങ്കര്‍ എന്ന കുട്ടിസര്‍ക്കാറിന്റെ വേഷം അഭിഷേകിന്റെ കയ്യില്‍ ഭദ്രമാണ്. ‘യുവ’, ‘ഗുരു’ എന്ന സിനിമകളിലെ പ്രകടനത്തിനോട് ചേര്‍ത്ത് വെക്കാം അഭിഷേകിന് ശങ്കര്‍ നാഗ്രയെ. കഥാപാത്രം ആവശ്യപ്പെടുന്ന മിതാഭിനയം കാഴ്ച വെക്കുന്നതില്‍ ഇതിലെ അഭിനേതാക്കളെല്ലാവരും (‘നീല്‍ ആന്‍‌ഡ് നിക്കി’യില്‍ വഷളന്‍പ്രകടനം കാഴ്ച വെച്ച തനീഷ പോലും) വിജയിച്ചിരിക്കുന്നു. അവരുടെ ചലനങ്ങളില്‍, ഡയലോഗ് ഡെലിവെറിയില്‍, ശരീരമാസകലം സംവിധായകമുദ്ര കാണാം. (അധികാരത്തിന്റെ) ഒരു കാണാചരട് കൊണ്ട് അഭിനേതാക്കളെ കഥാപാത്രങ്ങളാക്കി മാറ്റിയ വര്‍മ്മയുടെ സംവിധായകപാടവം പ്രശംസനീയമാണ്. ഇതിനൊരപവാദം അനിതാ രാജന്‍ എന്ന കോര്‍പ്പറേറ്റ് വ്യവസായിയെ അവതരിപ്പിച്ച ഐശ്വര്യ ബച്ചന്‍ മാത്രമാണ്. വികാരഭരിതമായ രംഗങ്ങളില്‍ അഭിനയിക്കാനുള്ള അവരുടെ കഴിവുകേടിന് മറ്റൊരുദാഹരണമാകുകയാണീ സിനിമ. വികാരമേതുമില്ലാത്ത അവരുടെ കണ്ണുകളില്‍ നിന്ന് ഗ്ലിസറിനൊഴുക്കി വിടുന്ന കണ്ണീര്‍ കണ്ടാല്‍ ചിരിയാണ് വരിക.


സത്യ, കമ്പനി, സര്‍ക്കാര്‍, നിശബ്ദ്, ഡാര്‍ലിംഗ് തുടങ്ങിയ മുന്‍‌കാലരാം‌ഗോപാല്‍ വര്‍മ്മ സിനിമകളില്‍ കണ്ടു മടുത്ത അവതരണശൈലി തന്നെയാണ് സര്‍ക്കാര്‍ രാജും പിന്‍‌തുടരുന്നത്. പ്രശാന്ത് പാണ്ഡേയുടെ തിരക്കഥയും സംഭാഷണങ്ങളും മികച്ച് നില്‍ക്കുന്നുവെങ്കിലും കൂടുതല്‍ മുറുക്കവും വേഗതയുമുള്ള സംവിധായകശൈലി അവ അര്‍ഹിക്കുന്നു. പല പല മൂലകളില്‍ (ആംഗിളുകളില്‍) നിന്നുള്ള ക്യാമറക്കാഴ്ചകള്‍ സിനിമയിലുടനീളം വരുന്നത് മടുപ്പുളവാക്കുന്നു. സീനുകളുടെ ദൈര്‍ഘ്യം ആവശ്യത്തിലും കൂടുതല്‍ നീട്ടാനേ അതുപകരിക്കുന്നുള്ളു. സുനില്‍ നിഗ്‌വേക്കറിന്റ കലാസംവിധാനം നന്ന്. സര്‍ക്കാറിന്റെ വീടും പശ്ചാത്തലങ്ങളും തികച്ചും റിയലിസ്റ്റിക്കായ രീതിയില്‍ ചിട്ടപ്പെടുത്തിയിരിക്കുന്നു അദ്ദേഹം.
അമിത് പര്‍മാര്‍, നിപുണ്‍ ഗുപ്ത എന്നിവരുടെ ചിത്രസംയോജനം സംവിധായകന്റെ മനസ്സിന്റെ അതേ വേഗതയില്‍ തന്നെ തളര്‍ന്ന് നീങ്ങുന്നു. പക്ഷെ അതില്‍ അവരെ പഴി പറയേണ്ടതില്ല എന്ന് തോന്നുന്നു. ബപ്പി-ടുട്ടുള്‍ ടീമിന്റെ ഗാനങ്ങള്‍ ‘ഗോവിന്ദ‘യ്ക്കക്കപ്പുറം ഒന്നുമില്ല. ആഡ്‌ലാബ്‌സിന്റെ വിഷ്വല്‍ ഇഫെക്ട്സ് പ്രത്യേകപരാമര്‍ശമര്‍ഹിക്കുന്നു. അമര്‍ മൊഹിലിയുടെ പശ്ചാത്തലസംഗീതം ‘ഗോവിന്ദാ’വിളികളുടെ അതിപ്രസരത്തിലും തിളങ്ങി നില്‍കുന്നു.

സര്‍ക്കാറിന്റെ കുതിപ്പും കിതപ്പും രാം‌ഗോപാല്‍ വര്‍മ്മയാണ്. അഭിനേതാക്കളുടെ മികച്ച പ്രകടനം പുറത്തേക്കെടുക്കുന്നതിലും സിനിമ തുടങ്ങിയ രീതിയിലും അവസാനിപ്പിച്ച ഒതുക്കത്തിലും100% മാര്‍ക്ക് നേടിയ അദ്ദേഹം പോസ്റ്റ് പ്രൊഡക്ഷന്‍ വേളയില്‍ സിനിമയുടെ ഒഴുക്കിനെ കുറിച്ച് ഇത്തിരി കൂടെ ബോധവാനായിരുന്നെങ്കില്‍ ‘സര്‍ക്കാര്‍ രാജ്‘ മികച്ച ഒരു പൊളിറ്റിക്കല്‍ ത്രില്ലറായ് മാറുമായിരുന്നു.

+ തിരക്കഥ, സംഭാഷണം, കഥാസന്ദര്‍ഭങ്ങള്‍
+ സംവിധായകന്‍ - സിനിമയിലെ കഥാപാത്രങ്ങളവതരിച്ച നടീനടന്മാരുടെ അഭിനയത്തില്‍, അവരുടെ ചലനങ്ങളില്‍, ഡയലോഗ് ഡെലിവെറിയില്‍, ശരീരമാസകലം സംവിധായകമുദ്ര കാണാം.
+ അമിതാബ് ബച്ചന്‍, അഭിഷേക് ബച്ചന്‍, രവി കാലെ തുടങ്ങി ചെറിയ വേഷങ്ങള്‍ വരെ അവതരിപ്പിച്ചവരുടെ മികച്ച അഭിനയം.
+ ക്ലൈമാക്സ്


x സംവിധായകന്‍ - മുന്‍‌കാലരാം‌ഗോപാല്‍ വര്‍മ്മ സിനിമകളില്‍ കണ്ടു മടുത്ത അവതരണശൈലി, ക്യാമറാ‍ ആംഗിളുകള്‍
x രംഗങ്ങള്‍ക്കിടയിലെ വേഗതക്കുറവ്
x അഭിനയിക്കാന്‍ കഷ്ടപ്പെടുന്ന ഐശ്വര്യ ബച്ചന്‍

x ‘ഗോവിന്ദാ’വിളിയുടെ അമിതോപയോഗം

--------------------------------------------------------------------------------------------------------------------------------------

4 comments:

ദൃശ്യന്‍ | Drishyan said...

സര്‍ക്കാറിന്റെ കുതിപ്പും കിതപ്പും രാം‌ഗോപാല്‍ വര്‍മ്മയാണ്. അഭിനേതാക്കളുടെ മികച്ച പ്രകടനം പുറത്തേക്കെടുക്കുന്നതിലും സിനിമ തുടങ്ങിയ രീതിയിലും അവസാനിപ്പിച്ച ഒതുക്കത്തിലും100% മാര്‍ക്ക് നേടിയ അദ്ദേഹം പോസ്റ്റ് പ്രൊഡക്ഷന്‍ വേളയില്‍ സിനിമയുടെ ഒഴുക്കിനെ കുറിച്ച് ഇത്തിരി കൂടെ ബോധവാനായിരുന്നെങ്കില്‍ ‘സര്‍ക്കാര്‍ രാജ്‘ മികച്ച ഒരു പൊളിറ്റിക്കല്‍ ത്രില്ലറായ് മാറുമായിരുന്നു.

രാം ഗോപാല്‍ വര്‍മ്മ അണിയിച്ചൊരുക്കിയ സര്‍ക്കാര്‍ രാജിന്‍‌റ്റെ കാഴ്ചകളാണ് പുതിയ സിനിമാക്കാഴ്ച യില്‍.

സസ്നേഹം
ദൃശ്യന്‍

പപ്പൂസ് said...

മിക്കതും എനിക്കു തോന്നിയതു തന്നെ. പക്ഷേ, തിരക്കഥയുടെ കട്ടിക്കാര്യത്തില്‍ നമ്മള്‍ അല്പം വ്യത്യസ്താഭിപ്രായം കാണിക്കുന്നു. എനിക്കിഷ്ടമായില്ല, തിരക്കഥയും.

നല്ല റിവ്യൂ! :-)

May be because I enjoyed the entire Godfather series...

ദൃശ്യന്‍ | Drishyan said...

പപ്പൂസേ, ആ കഥയ്ക്ക് വേണ്ട പിരിമുറുക്കം തിരക്കഥയിലും സംഭാഷണത്തിലുമുണ്ടായിരുന്നു, പക്ഷെ അവതരണം അതെല്ലാം മുഖവിലയ്ക്കെടുക്കാത്ത രീതിയിലായിരുന്നു എന്നാണെനിക്ക് തോന്നിയത്. തുറന്ന അഭിപ്രായത്തിന്‍ വളരെ നന്ദി. :-)

ഗോഡ്‌ഫാദര്‍ എന്‍‌റ്റെയും ഫേവറിറ്റ് ആണ്.

സസ്നേഹം
ദൃശ്യന്‍

vipin das said...

sarkar rajinu ee speed dharalam ayirunnu.. speed koodiyirunel aalukal oru action thriller pole pratheekshichene... its a gud one.. aa govinda govinda vili oru marathi style kondu varan sadhichu.. athu athyavasyirunu ee cinemak.. sarkarinu 85% mark undu.. sarkar rajinu 70% markum..